Malaysia Um Chin Ralzaam Chungin HIV Zawtnak Ngei An Tam Ngai
TOPICS:Ngandamnak
POSTED BY: SALAI ROBERT NGUN SANG APRIL 5, 2016
HIV Zawtnak Kongah Chinmi I Ralrin Kan Hau Cang
KUALA LUMPUR: 2016 February tiangah Malaysia ram ah Kawlram in ralzaam minung 144,380 an um tiah UNHCR cazin ning in theih a si. Hi chungah Chin ralzaam hi 44,870 an si i UNHCR nih a cohlan rih lomi asiloah register a tuah rih lomi hna hi mah khua le ram ah a kir than cangmi zong an tam ngai cang tikah minung 20,000 hrawng cu an um rih lai tiah ruahdamh a si. Hi lakah HIV zawtnak a ngeimi zong an um ve.
Malaysia ram ah ralzaam dirhmun in khua a sami Chinmi 60,000 leng chung ahhin HIV zawtnak a ngeimi hi a tlawmbik in minung 1,000 cu an si lai tiah theih a si. Hi zawtnak a ngeih le ngeihlo zong theih a si rih lomi zong tampi an um rih lai tiah ruah a si.
Brother Alex nih a tuahmi HIV Shelter hi Batu Arang ah a um i hmun hleiruk hrawng ah zawtnak ngeitu pawl cu zohkhenh an si. Hi hmun ah a ummi hna zong chung ahhin a tam deuh cu Chinmi an si tiah rak theih a si.
HIV zawtnak a ngei cang tiah hmuhmi hna ahhin kum upa nak-in kum no le kum ngakchia an tam deuh, cun nu nak-in pa a ngei mi an tam deuh. Hi zawtnak hi Malaysia phanh hunah si loin Kawlram in a rak ngei cia mi deuh an si. Cun, hi zawtnak a ngeimi a tam u cu chungkhar he a ummi/chungkhar a ngei mi an si fawn.
HIV zawtnak a ngei mi hna hi Laitlang leimi pawl nak-in Kawlrawn lei le Kawlram inn pawngkam ram pawl ah khua a rak sa bal deuh mi pawl khi an tam deuh tiah theih a si. Hi zawtnak he ramthumnak leiah a lanh cangmi hna le hi zawtnak ruangah a thi mi hi minung pazeizat an si cu theih khawh a si lo.
2014 tiang ahcun UNHCR nih hi bantuk zawtnak a rak ngeimi hna cu Free bak in rak zohkhenh an si ko nain atu ahcun zohkhenhnak le bawmhnak vialte pek a si ti lo tikah an caah a har taktak i lungrethei ngai an si.
“Hi zawtnak kongah Chinmi nulepa hna, abik in nungak le tlangval hna nih ralrinnak le i cawnpiaknak tampi kan ngeih a herh cang”, tiah min langhter duh lomi riantuantu pakhat nih a chim.
UNHCR nih a chimnak ahcun 2015 tiangah Chin ralzaam ramthumnak a phan cangmi hi minung 10, 300 leng an si cang ti a si.
