China le a innpa hna nih an buaipi ngaimi rili ah US raltuk tilawng a kal, China a lung rawk

South China Sea timi East Asia rili hi China,Philippines,Japan le Vietnam hna nih kan rili a si tiah an i cuhmi a si, China nih a thazaang in a tei deuh hna caah chuh dih a timh hna i tuhi rili cungah Island vawlei thar a ser cuahmah cang.China nih hakkau tuk in Philippines,Japan leVietnam te pawl an rili a rak chuh mi hna hi US nih a duh lo. Tuhi US raltuk tilawng(Guided-missile destroyer USS Lassen) cu China nih ka rili a si tiah a ti nak pawngah a va kal. Hihi China nih fak piin a doh ve, China ram nawlngeihnak a hnursuantiah an mawhchiat.US nih cun International Law ning in thil ka tuahmi a si,zeibantuk ram nawlngeihnak hmanh ka hnursuan mi a um lo tiah an chim ve. Japan le Philippines zong nih US a thil tuahmi cu an hung thangthat colh tiahBBCnih a tial.South China Sea ah a ummi rili Spratly Islands, Paracel Islands le Scarborough Shoal hna hi China nih keimah ta an si dih a ti, hika hmun ah ziinan le rili tang chuak thil mansung tampi an i tel hna. China nih hi hnahmun ah Island vawlei a ser,mah vawlei hi ralkap chiahnak caah a hman sual lai timi zong US nih a phan ngai mi a si fawn.A tu US nih South China Sea ah an thlah hnawhmi raltuk tilawng ah hin rili ralkap 330 leng an i tel kho, helicopter 2 zong aa tel chih fawn. Bomb kahnak le meithal kahnak vialte zong a um chih dih mi a si i US raltuk tilawng vialte lakah a tha bik lai a si lai an ti.China nih East Asia ram chung hmunhma a rak lak tuk mi hi US nih a duh lo,US nih a si khawh chung in East Asia ram chungah hmunhma lak a duh ve caah hiti China a thil tuahmi a doh lengmang ve nak a si. A tu ning in cun US le China kar pehtlainak rawk ngai dawh a si.