Suu Kyi hruaimi NLD nih ‘tlen caan a cu cang’ tiah an aupi lengmang mi he pehtlai in Myanmar ram President Thein Sein nih thlencaan a cu cang an ti mi hi zeidah an chim duh mi a si, thlen ding a um ti lo, communistram ah kan thlen dah ti lo ah cun tiah a chim.“Kanmah USDP cozah hi cozah hlun phunglam(system) kha phunglam(system) thar ah a thlengtu kan si. System hlun in system a thar ah thlen timi hi tih a nung tak tak mi thil a si. Kanmah bantuk in thlennak a tuahtu an tam pi ve. Democracy ram phak huaha loin thisen he a buaibai cuahmah mi zong an tampi rih fawn. Cheukhat ram ah cun nifatin bomb a puak i rammi um ngam lotiang in an um hna. Hi hna ram he hin thlennak a tuahti mi kan si hna. Kan nih cu duhsah tein le i ralrin bu tein thlennak kan tuah caah tuhi democracy ram kan phak hi a si. Hihi thlennak cu a si. Mipi nih thimmi cozah nih uknak khawhnak dingah thlennak kan tuah cang. Hihnu ah zeidah thlen ding a um ti? Hihnu ah thlen ding dang a um ti lo, communist(Democracy phung he aa kalhmi uknak,China ram bantuk) ram ah kan thlen dah ti lo cun! Communist ram ah maw thlen nan duh?,” tiah President Thein Sein nih a chuahsemnak khua a si mi Ngapuh-taw khua a tlawn lio ah a chim.Tuhi cu thlennak cu tuah a si cang caah tuhnu tuah rih a herhmi cu thlennak hi fek tein hmailei a kal rih khawh nak hnga tuanvokan lak cio a herh tuk tiah President Thein Sein nih a chim chih fawn.“Kanmah nih kan thlen cang,kan thlen ciami tu hi fek tein a kal rih khawh nak hnga tuanvo kan lak rih a herh tuk. Thlennak ah kan fehter a herh mi cu ram khel lei, sipuazi lei le i hruaining lei zong hi fek tein kan kal pirih a hau,” tiah a chim.President Thein Sein hi voidang nak in tukar a khual tlawn a tam deuh ngai ngai,khual a tlawnnak zongah USDP tanpi tu hna nih dawn le conglawmh a si,bawmhnak tete zong a pek mi an tam ngai hlei ah a thil tuahmi pawl cu cozah thawngzamhca ah tam ngai in langhter a si fawn caah USDP party caah mee pek sawmnak a tuahmi hna a lo tiah mi tampi nih soisel a si.
No comments:
Post a Comment